«Ұрып-соғып, мал бақтырған»: Ақмола облысында ер адам учаскелік полицейден қорлық көргенін айтты

Ақмола облысы, Бұланды ауданы, Вознесенка ауылының тұрғыны Евгений бейнкүндеу жасады, деп хабарлайды POLITICO.KZ

Ер адам өзінің балалар үйінен шыққанын, әйелі мен ұлы бар екенін айтты. Ол үш жыл бұрын Вознесенка ауылына көшіп келген. Ер адам ішімдікке әуес, сондықтан ол полицияның мұқият назарында болған көрінеді. Бірақ жергілікті полицей Рүстем Жақыпов ер адамды өз жеке басының жұмысына пайдаланған. Евгенийдің айтуынша, ол полицейге үш жыл жұмыс істеген. Малын қарап, ағашын кескен. Бірақ жалақысы мардымсыз болған. Ең сорақысы, полицей ер адамды жиі ұрып-соғып, қысым жасаған. Евгений кейде үйіне баруға қорқып, даладағы қирандылардың астында түнеген. Бірнеше күн бұрын Евгений ұлын мектепке дайындау үшін және Көкшетауға бару үшін жұмыс берушіден жалақы сұраған. Бірақ полицей еңбекақысын беруден бас тартыпты. Ер адам осы жағдайдан кейін қашып кеткен. Бірақ ол өмірі үшін алаңдаулы.

Бүгін, 29 тамыз күні ер адамды Бұланды ауданының прокуроры қабылдады. Nayzakokshe.kz бұл ақпаратты жариялағасын, полицей зейнетке шығарылған. 

Евгений жіберген бейнеөтініш Ақмола облысының полиция департаментіне жолданды.