Үш жасырын оқу орталығының қызметі тоқтатылды: ҰҚК Атырауда 10 адамды ұстады
Ұсталғандар экстремистік топ құру, оған басшылық ету және оның қызметіне қатысу, сондай-ақ терроризмді насихаттау және діни алауыздықты қоздыру бойынша күдікке ілінген.
2026 жылғы 30 қазанда ҰҚК прокуратура органдарының үйлестіруімен Атырау қаласында сотқа дейінгі тергеп-тексеру шеңберінде бір мезгілде 10 адамды ұстады, деп хабарлайды sadaq.kz ҰҚК-не сілтеме жасап.
Ведомствоның ресми сайтында хабарланғандай, ұсталғандар экстремистік топ құру, оған басшылық ету және оның қызметіне қатысу, сондай-ақ терроризмді насихаттау және діни алауыздықты қоздыру бойынша күдікке ілінген.
"Тергеу нұсқасы бойынша, қылмыстық топ мүшелері Қазақстанның батыс өңірінде конституциялық құрылыс негіздерін күшпен өзгерту мақсатын көздеген", - делінген хабарламада.
Фигуранттардың тұрғылықты жерлерінде жүргізілген тінту барысында атыс қаруы, есірткі, діни атрибутика, әдебиеттер және өзге де заттай дәлелдемелер тәркіленген.
Сондай-ақ олар құрған балалар мен жасөспірімдерге арналған 3 жасырын оқу орталығының қызметі тоқтатылған. Топтың бірқатар мүшесі бұған дейін террористік және жалпы қылмыстық құқықбұзушылықтар жасағаны үшін сотталған.
ҰҚК Қылмыстық-процестік кодекстің 201-бабына сәйкес өзге ақпарат жарияланбайтынын мәлімдеді.
