Сегіз жыл бойы киберқудалауға ұшыраған Атыраулық қыздың оқиғасы (ВИДЕО)

Интернеттегі таныстықтың салдары ауыр болды. Атыраулық тұрғын сегіз жыл бойы киберқудалауға ұшырағанын айтып, полициядан көмек сұраған.

Ақжайық сайтының хабарлауынша, 23 жастағы Виолетта Цоколь 15 жасынан бері киберқудалауға ұшырап жүргенін мәлімдеді. Оның айтуынша, интернет-ойында танысқан Киев қаласының тұрғыны байланыс үзілгеннен кейін өзінше өш алып, жалған аккаунттар арқылы қыздың атынан арандатушылық жазбалар жариялап, бөгде адамдармен интим сипаттағы хат алмасулар жүргізген.

«Бұл бірнеше жылдан бері жалғасып келеді. Күнделікті бір нәрсе болып қала ма деп қорқынышпен өмір сүріп жүрмін», — дейді Виолетта Цоколь видеомәлімдемесінде.

Зардап шегушінің сөзінше, кей жазбалар діни орындар туралы жалған пікір қалдыруға дейін барған, ал кей хаттарда оның нақты мекенжайы көрсетілген. Соның салдарынан үйіне бейтаныс адамдар келген жағдайлар да болған. Қыз бұл әрекеттердің барлығы оның келісімінсіз жасалғанын айтып, қауіптеніп жүргенін жеткізді.

2025 жылы Виолетта киберполицияға бірнеше рет жүгінген, ал жиналған дәлелдер негізінде 2026 жылы арызы ресми түрде қабылданған. Ол қудалаушы ретінде Киевте тұратын 22 жастағы азаматты Михаил Прохоровты атады. Қазіргі таңда Атырауда іс ҚК-нің 115-1-бабы («Сталкинг») бойынша қаралуда, деп хабарлайды Sadaq.kz.