ШҚО-да 50 жастан асқан адамдарға жұмыс істемесе де миллиондаған қаражат аударылған

Алтай ауданында прокурорлық қадағалау актісі бойынша бюджетке 4,6 млн теңге қайтарылды. Қаражат 50 жастан асқан азаматтарды жұмысқа орналастыруға жәрдемдесуге бағытталған "Күміс жас" мемлекеттік жобасын іске асыруға арналған еді, деп хабарлайды sadaq.kz облыстық прокуратураға сілтеме жасап.

Ведомствоның ресми сайтында хабарланғандай, Алтай ауданында 50 жастан асқан азаматтарды жұмысқа орналастыруға жәрдемдесуге бағытталған "Күміс жас" мемлекеттік жобасын іске асыру кезінде заңнама талаптарының бұзылғаны анықталды.

Жоба аясында бағдарламаға қатысу мерзіміне байланысты жұмыс берушілерге жұмысқа орналастырылған азаматтардың жалақысының 60-тан 70 пайызға дейінгі бөлігі бюджет қаражаты есебінен субсидияланады.

"Жұмыс беруші қызметкерлердің нақты жұмыспен қамтылуы туралы бұрмаланған мәліметтер ұсынған. Оның ішінде кейбір қызметкерлердің жұмыс орындарында нақты болмағанына, соның ішінде аудан аумағынан тыс жерлерге шығып кеткеніне қарамастан, жұмыс уақытын есепке алу табельдерінде толық жұмыс күндері мен сағаттары көрсетілген", - делінген прокуратура хабарламасында.

Нәтижесінде мемлекеттік субсидия қызметкерлердің жұмыста болғаны жеткілікті түрде расталмастан аударылған. Аударылған қаражаттың жалпы сомасы – шамамен 4,6 млн теңге.

Прокурорлық қадағалау актісі бойынша төленген субсидиялар қайта есептеліп, бюджет қаражаты мемлекет кірісіне толық көлемде қайтарылды.