Тоқаев Өзбекстанда өтіп жатқан халықаралық конференцияда сөз сөйледі

Бүгін Самарқандта «Орталық Азия – Еуропа Одағы» саммиті мен «Жаһандық климат сын-қатерлері кезеңіндегі Орталық Азия» халықаралық конференциясы өтіп жатыр.

Ақорда Қазақстан Президентінің сөйлеген сөзін жариялады. 

Орталық Азия – планетадағы климат өзгерістеріне ең осал өңірлердің бірі

Мұнда жаһандық жылыну әлемдегі орташа көрсеткіштен екі есе жылдам жүріп жатыр. Аймақ тосын табиғат құбылыстарымен, атап айтқанда, мұздықтардың еруі, шөлейттену және су тапшылығы секілді сын-қатерлермен бетпе-бет келіп отыр.

Бірлесіп әрекет етудің қажеттілігі

Орталық Азия елдерінің орнықты дамуы үшін экономикалық өсім мен климаттық саясат арасындағы тепе-теңдікті қатаң сақтау керек.

Қазақстан және «жасыл» экономика

- Жасыл сутегі өндірісі бойынша дүние жүзіндегі ең ірі жобалардың бірін, соның ішінде, жаңартылатын энергия көздерін дамыту.

- Әлемнің жетекші корпорацияларымен бірлесіп жел, күн энергиясын өндіру жобаларын іске қостық.

- Уран өндірісінің 40 пайызға жуығы Қазақстанға тиесілі. Қазіргі кезде еліміз зиянды шығарындыларды азайтып, энергетикалық қауіпсіздікті нығайту үшін алғашқы атом электр стансасын салуды жоспарлап отыр.

Су ресурстары – өңірге ортақ сын-қатер

- Соңғы жиырма жылда жан басына шаққандағы сумен қамтамасыз ету көрсеткіші 30 пайызға кеміді.

- Аймақтағы су ресурстарының 70 пайызы – трансшекаралық.

- Қазақстан бұрыннан айтылып келе жатқан Орталық Азия су-энергетика серіктестігін құру бастамасын ілгерілетуге әзір.

- Су үнемдеу технологияларын және smart суару мен гидрологиялық мониторинг жүйелерін дамыту ісінде халықаралық қоғамдастықтың қолдауы қажет.

Биоалуантүрлілік және экожүйе

- Аймақтың биоалуантүрлілігі мен экожүйесін сақтау маңызды.

- Қазақстан Халықаралық биоалуантүрлілікті қорғау қорын құрады.

- Елімізде ормандарды қорғау және сақтау бойынша арнайы бағдарлама жүзеге асырылып жатыр.

- Жас ұрпақтың экологиялық санасын қалыптастыруға бағытталған «Таза Қазақстан» экологиялық акциясы өткізіліп келеді.

- Қазақстан мен Өзбекстан Арал теңізінің құрғаған табанын көгалдандыру ісін бірлесіп атқаруда.

Жаһандық климат

- Климаттық мақсаттағы мемлекеттік және жекеменшік қаржыландыру көлемі де соған сай болуы керек.

- Елдеріміз бірлескен күш-жігерді еселеп, серіктестік аясын кеңейту арқылы ғана орнықты және экологиялық экономика құра алады.

Конференция жұмысына Орталық Азия мемлекеттерінің басшылары, Еуропа Одағының, БҰҰ-ның және халықаралық қаржы ұйымдарының жетекшілері қатысты.