«Он­дай жайттарға жол берілмейді»: Тоқаев сарбаздардың өліміне қатысты пікір білдірді

Қасым-Жомарт Тоқаев «Тurkistan» газетіне берген сұқбатында әскердегі сарбаздар өліміне қатысты пікірін білдірді, деп хабарлайды sadaq.kz. 

Тоқаевтың айтуынша, әскери борышын өтеуге ша­қырылған сарбаздардың жарақат алуы мен қаза болуына қатысты оқиғалар өр­кениетті елге жат, теріс үрдіс. Бейбіт заманда мұндай жайт­тар болмауға тиіс дейді. Қорғаныс саласына жауапты мекеменің басшылығын тәрбие жұмысын дұрыс қолға  алмағаны үшін сынағанын да атап өтті. 

– Армия жас­тарға қолдау көрсетіп, оларды елі­міз­дің нағыз азаматы ретінде тәрбиелеп шығаруы керек. Командирлер әскери қызметшілерге үлгі-өнеге болуға тиіс. Әскерде әлімжеттікке, бұзақылыққа, рушылдыққа, жершілдікке орын жоқ, он­дай жайттарға жол берілмейді. Мұ­ның бәрін өзім жеке қадағалап отыра­мын. 

– Мен ахуалды түзеу үшін шұғыл ша­ра­лар қабылдау жөнінде бұйрық бердім. Де­генмен, қайғылы оқиғалар әскери бө­лімшелердің бәрінде болып жатпаға­нын атап өткен жөн.  
Тексеру жұмыстары, жалпы, әскер­дегі тәртіп қатаң сақталатынын көрсет­ті. Танымалдыққа ұмтылған кейбір бло­герлер әскердегі шынайы ахуалға мүл­дем жанаспайтын сөз таратып жүр. Олар армияны сарбаздар күн сайын дер­лік қылмыскерлердің құрбанына ай­налып, қаза табатын жер ретінде көр­сеткісі келеді.   

– Шын мәнінде, сарбаз болу – өзіңді да­мыту үшін тың мүмкіндіктерге ие болу деген сөз. Әскери борышын өтеп қайт­қан жастар жоғары оқу орындары мен колледждерде тегін оқи алады. Олар әскерде жүргенде сұранысқа ие мамандықтарды меңгереді. Келісім­шарт­пен жұмыс істейтін әскери қызмет­ші­лер мен офицерлер әлеуметтік жағы­нан барынша қорғалған. 

– Армияда темірдей тәртіп болуға тиіс. Сарбаздар ант бергенде айтатын «Әске­ри қызметтің ауыртпалықтары мен қиыншылықтарын табандылықпен көтеремін» деген сөзден әскери өмірдің қатаңдығын айқын аңғаруға болады. Әскери қызметтің абырой-беделін кө­теру және еліміздің қорғаныс қабіле­тін арттыру – мемлекеттің басты басым­ды­ғының бірі,- дейді Президент.