Түркістан облысында «Auyl invest fest. Балық аулау – 2026» бірінші халықаралық фестивалі өтті

Мемлекет басшысы Қасым-Жомарт Тоқаевтың ауыл шаруашылығын әртараптандыру, табиғи ресурстарды тиімді пайдалану және өңірлерде жаңа экономикалық бағыттарды дамыту жөніндегі тапсырмалары аясында Түркістан облысында балық шаруашылығын өркендету бағытында ауқымды жұмыстар атқарылып келеді. Әсіресе акваөсіру саласын дамыту, инвестиция тарту, су ресурстарын ұқыпты пайдалану және ауылдық аумақтарда жаңа жұмыс орындарын ашу мәселелеріне ерекше мән берілуде, деп хабарлайды Sadaq.kz.

Түркістан облысының әкімдігі балық шаруашылығын тек экономикалық сала ретінде ғана емес, өңірдің туристік әлеуетін арттыратын, экологиялық мәдениетті қалыптастыратын және халықтың бос уақытын тиімді ұйымдастыруға мүмкіндік беретін маңызды бағыт ретінде қарастырып отыр. Осы бағыттағы жүйелі жұмыстар облыс әкімі Нұралхан Көшеровтің тікелей бақылауында жүзеге асырылуда.

Осы мақсатта Түркістан облысының әкімдігі мен «Ауыл» партиясы бірлесіп, «AUYL INVEST FEST. Балық аулау – 2026» атты алғашқы халықаралық балық аулау фестивалін ұйымдастырды. Ауқымды шара өңірдегі балық шаруашылығының мүмкіндігін таныстырумен қатар, отандық және шетелдік балықшылардың басын қосқан маңызды спорттық әрі туристік жобаға айналды.

Фестивальдің негізгі мақсаты – салауатты өмір салтын насихаттау, спорттық балық аулау мәдениетін дамыту, қоршаған ортаны қорғау бағытындағы жұмыстарды күшейту, халықаралық тәжірибе алмасу және Түркістан облысының туристік тартымдылығын арттыру. Сонымен бірге шара ауыл еңбеккерлерінің, кәсіпкерлердің және балық шаруашылығы саласында еңбек етіп жүрген мамандардың еңбегін дәріптеуге бағытталды.

Салтанатты ашылу рәсіміне «Ауыл» партиясы төрағасының орынбасары Қайрат Айтуғанов, Түркістан облыстық табиғи ресурстар және табиғат пайдалануды реттеу басқармасының басшысы Ғалымжан Төлепов, «Ауыл» партиясының Түркістан облысы бойынша өңірлік филиалының төрағасы, облыстық мәслихат депутаты Төрегелді Қалмұратов, облыстық мәслихат депутаты Нұржан Әжіметов және өзге де сала өкілдері қатысты.

Жиын барысында қатысушылар балық шаруашылығының өңір экономикасындағы маңызына тоқталып, бұл саланың ауылдық жерлердегі кәсіпкерлікті дамытуға, халықтың табысын арттыруға және азық-түлік қауіпсіздігін қамтамасыз етуге қосатын үлесін атап өтті.

Фестиваль аясында экологиялық бағыттағы шаралар да ұйымдастырылды. Атап айтқанда, «Таза Қазақстан» жалпыұлттық экологиялық акциясы аясында ағаш отырғызу жұмыстары жүргізіліп, табиғатты қорғау, қоршаған ортаға жауапкершілікпен қарау құндылықтары насихатталды. Бұл бастама спорттық шараның экологиялық мазмұнын күшейтіп, қатысушыларға табиғи байлықтарды сақтаудың маңызын көрсетті.

Халықаралық деңгейде өткен балық аулау жарысы «Rauan Ranch» демалыс аймағында ұйымдастырылды. Байқауға Қазақстанның әр өңірінен және жақын әрі алыс шетелдерден келген 10 команда қатысты. Қатысушылар бірнеше бағыт бойынша өзара бақ сынады. Атап айтқанда, қалқымалы қармақпен балық аулау, жағадан спиннинг арқылы балық аулау және фидерлік спорттық балық аулау бойынша жарыстар өтті.

Бұл сайыстар тек жеңімпазды анықтауға емес, балық аулау спортын дамытуға, тәжірибе алмасуға және түрлі елдер мен өңірлердің балықшылары арасында достық байланысты нығайтуға мүмкіндік берді.

Жарыс қорытындысы бойынша үздіктер анықталып, арнайы марапаттарға ие болды. Қармақпен балық аулау бағытында Шымкент қаласының командасы бірінші орынды иеленді. Екінші орын Қырғызстан Республикасының құрамасына бұйырса, үшінші орынды Түркістан облысының командасы алды.

Спиннингпен балық аулау жарысында Қызылорда облысының өкілдері үздік нәтиже көрсетіп, бірінші орынға ие болды. Жамбыл облысының командасы екінші орынды иеленсе, Қырғызстан Республикасының балықшылары үшінші орынға тұрақтады.

Ал фидерлік спорттық балық аулау бойынша Қырғызстан Республикасының командасы жеңімпаз атанды. Шымкент қаласының командасы екінші орынға ие болса, Қызылорда облысының өкілдері үшінші орынды иеленді. Жеңімпаздарға арнайы дипломдар, қаржылай сыйлықтар және бағалы марапаттар табысталды.

Сонымен қатар жарыс барысында ерекше белсенділік танытқан жекелеген қатысушылар да назардан тыс қалмады. Ұйымдастырушылар «Ең үлкен балық ұстаушы», «Ең кішкентай балық ұстаушы», «Ең көп балық ұстаушы» сынды арнайы номинациялар бойынша үздіктерді анықтап, оларға дипломдар мен бағалы сыйлықтар тапсырды.

Бас төрешінің мәліметіне сәйкес, жарыс барысында ауланған ең ірі балықтың салмағы 3,2 келіні құраса, ең кішкентай балықтың салмағы 50-70 грамм шамасында болған. Бұл көрсеткіштер қатысушылардың шеберлігі мен табиғи су айдындарындағы балық қорының әлеуетін көрсетті.

Бүгінде Түркістан облысында балық шаруашылығы қарқынды дамып келе жатқан салалардың біріне айналды. Өңірде 184 балық өсіру шаруашылығы жұмыс істейді. Сонымен қатар облыс аумағында 104 жергілікті маңызы бар су айдыны тіркелген, оның 74-інде балық шаруашылығы бағытында жұмыстар жүргізілуде.

Шардара ауданында балық өндірісіне ерекше көңіл бөлінуде. Мұнда жылына 12 мың тонна балық өнімін өндіруге қауқарлы төрт ірі кәсіпорын жұмыс істейді. Бұл кәсіпорындар өңірдің ғана емес, еліміздің азық-түлік қауіпсіздігін қамтамасыз етуге өз үлесін қосып отыр.

Жасанды жолмен балық өсіру, яғни акваөсіру саласында Түркістан облысы республика бойынша алдыңғы қатарда келеді. Өткен жылы жоспарланған 7 467 тонна балық өсіру көлемі толық орындалды. Бұл саладағы жетістіктер мемлекеттік қолдау шараларының, инвестициялық жобалардың және кәсіпкерлердің белсенді жұмысының нәтижесі болып табылады.

Акваөсіру саласын дамыту мақсатында облыстық және республикалық бюджет есебінен субсидиялар мен түрлі қолдау тетіктері қарастырылған. Мұндай мүмкіндіктер кәсіпкерлерге өндіріс көлемін арттыруға, заманауи технологияларды енгізуге және өнім сапасын жақсартуға жол ашады.

Қазіргі таңда облыста жаңа инвестициялық жобаларды жүзеге асыру, отандық және шетелдік инвесторларды тарту бағытында жұмыстар жалғасуда. Бұл бастамалар балық өнімдерінің өзіндік құнын төмендетуге, өндіріс көлемін арттыруға және өңір өнімдерінің бәсекеге қабілеттілігін күшейтуге мүмкіндік береді.

Балық шаруашылығының дамуы тек өндірістік көрсеткіштермен шектелмейді. Бұл сала ауылдық жерлердегі кәсіпкерлікті дамытуға, жаңа жұмыс орындарын ашуға, туризмді жандандыруға және табиғи ресурстарды тиімді пайдалануға ықпал етеді. Әсіресе спорттық балық аулау сияқты бағыттардың дамуы өңірдің туристік мүмкіндігін кеңейтіп, табиғи аймақтарға келушілер санын арттыруға мүмкіндік береді.

«AUYL INVEST FEST. Балық аулау – 2026» халықаралық фестивалі осы бағыттағы маңызды жобалардың біріне айналды. Шара арқылы Түркістан облысының табиғи әлеуеті, балық шаруашылығы саласындағы мүмкіндіктері және туристік бағыттары кеңінен таныстырылды.

Фестиваль алдағы уақытта дәстүрлі түрде өткізіліп, халықаралық деңгейдегі спорттық және экологиялық шара ретінде дамытылмақ. Бұл бастама Түркістан облысының балық шаруашылығын жаңа деңгейге көтеріп қана қоймай, өңір экономикасының тұрақты дамуына, ауылдық аумақтардың әлеуетін арттыруға және табиғатты қорғау мәдениетін қалыптастыруға оң ықпал етеді.