Түркістан облысында қоғамдық қабылдау өтіп, тұрғындардың өзекті мәселелері талқыланды

Түркістан облысында халықпен кері байланысты нығайту, тұрғындардың ұсыныс-тілектерін тыңдау және олардың мәселелерін шешу бағытындағы жұмыстар жүйелі түрде жалғасып келеді. Осы мақсатта облыс әкімі Нұралхан Көшеров кезекті қоғамдық қабылдау өткізіп, өңірдің әр аудан-қаласынан келген азаматтарды жеке қабылдады, деп хабарлайды Sadaq.kz.

Қоғамдық қабылдау барысында облыс басшысы 150-ге жуық тұрғынмен кездесіп, олардың өтініштері мен ұсыныстарын тыңдады. Бірнеше сағатқа созылған ашық форматтағы кездесуде азаматтар өздерін толғандырған мәселелерді тікелей жеткізіп, жауапты мемлекеттік органдардың қатысуымен нақты шешу жолдарын талқылады.

Қабылдауға облыс әкімінің орынбасарлары, облыстық басқармалардың басшылары, аудан және қала әкімдері, құқық қорғау органдарының өкілдері, тиісті сала мамандары қатысты. Бұл тұрғындардың көтерген мәселелерін жан-жақты қарауға, әрбір өтініш бойынша жауапты мекемелердің ұстанымын нақтылауға мүмкіндік берді.

Кездесу барысында азаматтардың өтініштері тек тыңдалып қана қоймай, әр мәселе бойынша нақты әрекет ету алгоритмі белгіленді. Кейбір мәселелер сол жерде шешімін тапса, қосымша зерделеуді қажет ететін өтініштер бойынша жауапты тұлғаларға нақты тапсырмалар беріліп, орындалу мерзімі белгіленді. Барлық өтініштер бақылауға алынып, олардың шешілу барысы тұрақты түрде қадағаланады.

Қоғамдық қабылдау тұрғындар мен мемлекеттік органдар арасындағы ашық диалог алаңына айналды. Азаматтар негізінен әлеуметтік және тұрмыстық сипаттағы мәселелерін көтерді. Атап айтқанда, тұрғын үймен қамтамасыз ету, жер қатынастары, әлеуметтік көмек алу, денсаулық сақтау саласы, жұмыспен қамту, инженерлік инфрақұрылымды дамыту, ауыз су, жол, электр желілері және құқықтық мәселелер бойынша ұсыныстар айтылды.

Облыс әкімі әрбір азаматтың өтініші заң талаптары мен қолданыстағы нормативтік нормаларға сәйкес қаралатынын атап өтті. Оның айтуынша, мемлекеттік органдардың негізгі міндеті – тұрғындардың мәселесін тыңдап қана қоймай, оны шешуге бағытталған нақты жұмыс жүргізу.

Нұралхан Көшеров қабылдау барысында көтерілген мәселелердің барлығы халықтың күнделікті өмір сапасына тікелей әсер ететін маңызды бағыттар екенін айтып, жауапты басқарма басшыларына әрбір өтінішті мұқият зерделеуді тапсырды.

Жер қатынастарына байланысты мәселелер де қоғамдық қабылдауда кеңінен талқыланды. Бұл бағытта облыс басшысы заң талаптарының қатаң сақталуы қажет екенін атап өтті.

– Инженерлік инфрақұрылымы дайын емес жер телімдерін азаматтарға беру заң талаптарына сәйкес келмейді. Сондықтан бұл мәселеде заңдылық пен тәртіп бірінші орында тұруы керек. Сонымен қатар жер кезегінде тұрған азаматтардың құқықтары толық сақталуға тиіс. Кезектілік тәртібінен ешқандай ауытқуға жол берілмейді, – деді облыс әкімі.

Ол жер мәселесін шешуде ашықтық пен әділдік қағидаттарының маңызды екенін айтып, жауапты органдарға тұрғындарға заң аясында түсіндіру жұмыстарын күшейтуді тапсырды.

Қабылдау барысында тұрғын үй мәселесі де негізгі тақырыптардың бірі болды. Азаматтар баспанамен қамту, тұрғын үй бағдарламаларына қатысу, әлеуметтік санаттағы азаматтарға берілетін мүмкіндіктер жөнінде өз сауалдарын жолдады.

Нұралхан Көшеров Түркістан облысында тұрғын үй құрылысы қарқынды дамып келе жатқанын атап өтті. Бүгінде өңір республикадағы құрылыс көлемі жоғары аймақтардың қатарында. Жыл сайын облыста шамамен 1 миллион шаршы метр тұрғын үй пайдалануға беріліп, халықты баспанамен қамтамасыз ету бағытында ауқымды жұмыстар атқарылуда.

Өңір басшысы тұрғын үй мәселесін шешу тек жаңа үйлер салумен шектелмейтінін, сонымен бірге инженерлік инфрақұрылымды дамыту, елді мекендерді абаттандыру және халықтың өмір сүру сапасын арттыру бағытындағы кешенді жұмыстармен қатар жүруі керектігін айтты.

Кездесуде ауылдық округ әкімдерінің жұмысына қатысты тұрғындардың ұсыныстары мен сын-пікірлері де айтылды. Кейбір азаматтар жергілікті жердегі мәселелерді шешуге қатысты ойларын ортаға салса, енді бірі ауыл инфрақұрылымын дамыту, әлеуметтік нысандардың жағдайын жақсарту жөнінде ұсыныстарын жеткізді.

Облыс әкімі әрбір ұсыныс назардан тыс қалмайтынын айтып, көтерілген мәселелердің барлығы тиісті деңгейде сараланатынын жеткізді. Оның айтуынша, халықтың пікірін тыңдау – мемлекеттік басқарудың тиімділігін арттырудың маңызды құралы.

Қабылдауды қорытындылаған Нұралхан Көшеров мемлекеттік қызметтің басты өлшемі – халықтың сенімі екенін атап өтті.

– Біз үшін әрбір азаматтың мәселесі маңызды. Қоғамдық қабылдау – жай ғана кездесу емес, халықтың мұң-мұқтажын тыңдап, нақты шешім қабылдайтын жұмыс алаңы. Әрбір өтініш мұқият зерделеніп, заң аясында нәтижелі шешілуі тиіс.

Мемлекет басшысы Қасым-Жомарт Тоқаев халықпен кері байланысты күшейтуді және әрбір азаматтың үнін естуді мемлекеттік саясаттың маңызды бағыты ретінде айқындады. Осы бағытта қоғамдық қабылдаулардың маңызы зор.

Мұндай кездесулер тұрғындардың мәселесін тыңдап қана қоймай, олардың шешу жолдарын нақты белгілеуге мүмкіндік береді. Әрбір өтініш жауапсыз қалмайды. Барлық мәселе заң аясында қаралып, бақылауда болады. Азаматтардың мемлекетке деген сенімі нақты іспен қалыптасады. Сондықтан халықпен тұрақты байланыс орнатып, әрбір көтерілген мәселені соңына дейін жеткізу – баршамызға ортақ міндет, – деді облыс әкімі.

Қоғамдық қабылдау барысында айтылған барлық ұсыныстар хаттамаға енгізіліп, тиісті мемлекеттік органдарға жолданды. Жауапты сала басшыларына нақты тапсырмалар беріліп, олардың орындалу барысы бақылауға алынды.

Өңір басшысы тұрғындарды толғандырған мәселелердің түпкі себептерін анықтап, оларды жүйелі түрде шешудің маңыздылығына тоқталды. Оның айтуынша, қоғамдық қабылдаудың басты мақсаты – жекелеген өтініштерді қараумен ғана шектелмей, қоғамдағы өзекті мәселелерді анықтап, мемлекеттік органдар жұмысының сапасын арттыру.

Мұндай кездесулер арқылы жергілікті атқарушы органдар тұрғындардың нақты сұранысын біліп, әлеуметтік-экономикалық даму бағытындағы шешімдерді тиімді жоспарлай алады.

Түркістан облысында халықпен тікелей байланыс орнатуға ерекше мән беріліп келеді. Жыл басынан бері облыс әкімі мен оның орынбасарлары мыңнан астам тұрғынды жеке қабылдап, олардың мәселелерінің шешілу барысын тұрақты бақылауда ұстап отыр.

Бұл жұмыстар Мемлекет басшысы Қасым-Жомарт Тоқаевтың «Халық үніне құлақ асатын мемлекет» қағидатын жүзеге асырудың нақты көрінісі болып табылады. Азаматтардың өтінішіне жедел жауап беру, олардың ұсыныстарын ескеру және халықпен ашық диалог жүргізу – мемлекеттік басқарудың басты бағыттарының бірі.

Қоғамдық қабылдау барысында тұрғындар басшылармен еркін пікір алмасып, өз мәселелерін ашық жеткізді. Әрбір ұсыныс тіркеліп, тиісті сала мамандарына тапсырылды.

Алдағы уақытта да Түркістан облысында тұрғындармен тұрақты кездесулер өткізу, азаматтардың мәселелерін жедел шешу және мемлекеттік органдар жұмысының тиімділігін арттыру бағытындағы жұмыстар жалғаса береді.

Халықтың талап-тілегін есту, оның шешімін табуға нақты әрекет жасау – өңір дамуының маңызды кепілі. Ашық диалог пен өзара сенім негізінде жүзеге асырылып жатқан бұл жұмыстар тұрғындардың мемлекеттік органдарға деген сенімін арттыруға және өңірдегі әлеуметтік тұрақтылықты нығайтуға бағытталған.