«Қатты қорқамын»: Ермұрат Бәпи Назарбаевтың Путинмен кездесуі алаңдататынын айтты

Қазақстанның экс-президенті Нұрсұлтан Назарбаевтың Ресейге барып, Владимир Путинмен кездесуі қоғамда қызу талқыға түсіп жатыр.

Orda.kz тілшілері мәжіліс дәлізінде осы жайлы депутаттарға сұрақ қойды. Мәжіліс депутаты Ермұрат Бәпи бұл алаңдаушылық танытты:

«Менің ойымша, ол (Назарбаев. — ред.) қандай да бір кепілдіктерге мұқтаж болды. Назарбаев отставкаға кетердің алдында да ең алдымен Ресей президентімен ақылдасқан деп ойлаймын. Ол одан кепілдік алған, онсыз мұндай шешім қабылдамаған болар еді. Ал қазір, мүмкін, сол кепілдіктерді нығайту үшін барған шығар. Ол әлі де қоғамдағы, елдегі маңыздылығын жоғалтпадым деп ойлайды», — деді Ермұрат Бәпи. 

Сондай-ақ Бәпи Ресей президентінің Қазақстанның Тәуелсіздік күнімен құттықтамағанына назар аударды:

«Барлық ТМД елдерінен құттықтау келді, бірақ Ресейден еш хабар жоқ. Ақорда сайтынан қарасаңыз, Путиннің құттықтауы жоқ. Бұл нені білдіреді? Мысалы, мен қатты қорқамын. Ол осылайша біздің тәуелсіздігімізді мойындағысы келмейтінін көрсеткісі келді ме? Есіңізде болса, өткен аптада Ресей Қауіпсіздік кеңесі төрағасының орынбасары Медведев кейбір елдерді өз одағына қосу мүмкін екенін меңзеген еді. Бұл оның месседжі болды. Ал бір аптадан кейін Қазақстан үшін маңызды күн – Тәуелсіздік күні өтеді, бірақ Путиннен құттықтау жоқ. Бұл жерде әртүрлі қорытынды жасауға болады», — деді Ермұрат Бәпи.

Ермұрат Бәпи бұл жағдайды екінші Қаңтар оқиғасына түрткі болмайды деп санайды.

«Мұны ұйымдастыру ешкімнің қолынан келмейді. Тіпті Путин Құдай болған күннің өзінде. Қаңтар оқиғалары — бұл халықтың наразылығы, халықтың ерік-жігерінің көрінісі. Ал қайтадае тұтас қоғамның наразылығын қайта тірілте алатындай Путин сиқыршы емес», — деді Ермұрат Бәпи. 

«Бұл тек құрметтің белгісі»

Ал оның әріптесі Айдос Сарым бұл кездесуді қалыпты жағдай деп санап, оны жеке сапар ретінде бағалады:

«Назарбаевтың ешқандай мемлекеттік функциясы жоқ. Біз Путинге кіммен кездесуге болатынын бұйыра алмаймыз. Екеуі ұзақ уақыт бірге жұмыс істеді, бұл тек құрметтің белгісі деп ойлаймын», — деді. 

Қаңтар оқиғалары қайталануы мүмкін деген алаңдаушылыққа Сарым:

«Ешқандай мемлекет сыртқы күштердің әсерінен құламайды. Мемлекеттер ішкі қайшылықтардан күйрейді. Қаңтардан кейін біз арнайы қызметтер мен әскерді нығайттық. Бізде енді мұндай сынақтарға төтеп беретін иммунитет бар», — деді Айдос Сарым.

Депутаттардың пікірлері әртүрлі болғанымен, олардың сөздері бұл кездесудің маңыздылығы мен оның артында қандай саяси мәселелер тұрғаны жайлы әртүрлі тұжырымдарды көрсетті.

Желтоқсан айының ортасында экс-президент Назарбаев Путинмен оның резиденциясында кездесті. Кездесуде не айтылғаны жайлы толық ақпарат жоқ.