Астанада сәбидің үстіне қайнап тұрған шәйнек құлап кеткен

Астана дәрігерлері жүрегі 10 минут соқпай қалған 6 айлық сәбиді аман алып қалды, деп хабарлайды sadaq.kz.

Астана дәрігерлері жүрегі 10 минут бойы тоқтап қалған алты айлық сәбиді қайта өмірге әкелді. Клиникалық өлім жедел жәрдеммен реанимация бөліміне жеткізу кезінде, денесін күйік шалғаннан кейінгі ауырсыну шогының салдарынан орын алды.

Нәрестенің анасы Наталья Шлыкова былай дейді:

– Ол жүруге арналған қоларбада отырған еді, менің қасымда асүйде болды. Бір сәтке ғана көзімді басқа жаққа бұрып едім, қайнап тұрған шәйнек аударылып, тура үстіне төгілді. Сол кезде оның кеуде қуысы күйіп, қатты шок алды. Біз бір апта бойы жансақтау бөлімінде жаттық. Сегізінші күні өздігінен дем ала бастады, тамақ ішті. Дәрігерлер балама екінші өмір сыйлады.

Реаниматологтардың айтуынша, жүрек тоқтағаннан кейін оны қайта іске қосу тек 4-5 минут ішінде мүмкін болады. Бірақ бұл жағдайда 10 минут өткен соң сәбидің жүрегі қайта соға бастады. Дегенмен, бірнеше күн бойы оның өмірі қыл үстінде тұрды – ол жасанды тыныс алу аппаратына қосылып, күйікке қарсы терапия алды. Оқиға салдарынан баланың денесінің 25%-ы қайнаған сумен күйіп қалған.

Қазір сәбиге ешқандай қауіп жоқ, ол сауығып келеді.

Нұрсұлтан Құрбанбеков, №2 көпсалалы балалар ауруханасының анестезиология, реанимация және қарқынды терапия бөлімінің меңгерушісі:

– Біз жүрек қызметі тоқтаған жағдайда қолданылатын адреналинді тікелей жүрекке енгізуге мәжбүр болдық. Алғашқы үш тәулікте жүрек қызметінің тоқтауына байланысты жағдайы тұрақсыз болды. Бұл – өте сирек кездесетін, бірегей жағдай.