«Екі баласын қорғаған»: Теміртаулық әйел бөтен баланы соққыға жыққан

Теміртауда анасы екі баламен жүргенде өзге баланы ұрып, сот алдында жауап берді. Оқиға көпқабатты үйдің ауласында болған, деп хабарлайды Azattyq Rýhy. 

Оқиға қалай болды?
Теміртау қалалық сотының мәліметінше, айыпталушы әйел балаларымен бірге ауланың ойын алаңында болған. Сол жерде оның баласы құрдасымен сөзге келіп қалған. Сол сәтте әйел жанжалға араласып, басқа баланы киімінен сүйреп, алаңның ішінде жұлқылаған.

Ол кішкентай баланың бетіне шапалақпен ұрып жіберген. Салдарынан балада сүйек-мидың шайқалуы, гематома және дене жарақаттары анықталды.

Сотта әйел өз кінәсін толық мойындады. Оның әрекеті бейнебақылау камераларындағы жазбалар, зардап шеккен баланың және куәгерлердің көрсетулері, сондай-ақ сот-медициналық сараптаманың қорытындысы арқылы дәлелденді.

«Айыпталушының кінәсі толық дәлелденді. Жәбірленуші тараптың заңды өкілі соттан әділ шешім шығаруды сұрады», – делінген сот хабарламасында.

2025 жылдың 30 маусымында Теміртау қалалық соты әйелді кінәлі деп танып, оған 6 ай мерзімге бостандығын шектеу жазасын тағайындады. Сонымен қатар ол пробациялық бақылауға алынатын болды.

Сот жәбірленушінің азаматтық талабын ішінара қанағаттандырып, баланың отбасына моральдық өтемақы ретінде 100 мың теңге өндіруді шешті.

Сот үкімінде айыпталушының екі баласының бар екені және оның жасаған ісіне шын жүректен өкінгені жазаны жеңілдететін мән-жайлар ретінде ескерілді. Ал ауырлататын жағдайлар анықталмаған.