Qazaq Air Астана-Екатеринбург рейсін уақытша тоқтатты

Qazaq Air әуекомпаниясы биылғы 28 желтоқсан мен 2025 жылғы 27 қаңтар аралығында Астана-Екатеринбург бағыты бойынша әуе рейстерін орындауды уақытша тоқтатады, деп хабарлайды sadaq.kz.

Ресейге ұшу тәуекелдерін үнемі бағалау нәтижелерінің негізінде жолаушылар мен экипаж мүшелерінің қауіпсіздігін қамтамасыз ету мақсатында рейстер тоқтатылды.

Әуекомпания қазір Qazaq Air тәуекелдерін бағалау шарттарына сәйкес келетін Омбы мен Новосібірге рейстерді орындауды жалғастырады. Екатеринбургке әуе рейстерін қайта ашу – тәуекелдерді қайта бағалау қорытындылары бойынша іске асырылатын болады, – делінген компания хабарламасында.

Тоқтатылған рейстердің жолаушыларына әуе билеттерінің толық құны қайтарылып, әуекомпанияның баламалы рейстеріне тегін қайта брондау ұсынылады.