Ресейде жарылыс болды

Ресей Қарулы күштерінің стратегиялық мақсаттағы зымыран әскерлері орналасқан база аумағында, Орынбор облысына қарасты Орск қаласының жанындағы Ясный маңында зымыран ұшыру кезінде төтенше жағдай болды, деп жазады sadaq.kz сайты DW мәліметіне сүйеніп.

Алдын ала ақпаратқа қарағанда, 28 қараша күні күндіз зымыран басқарудан шығып, жерге құлап жарылған. Жарылыс туралы деректерді оқиға куәгерлері мен әлеуметтік желілердегі түрлі жазбалар да растаған. Аймақ тұрғындары әлеуметтік желілерде әскери нысан маңынан көтерілген қою түтіннің суреттерін бөліскен. Қалалық чаттарда өткір иіс сезілгені және тыныс алудың қиындағаны туралы шағымдар пайда болғаны жөнінде өңірлік 56orb басылымы хабарлады. 

Украиналық Supernova+ жобасы зымыранның ұшырылған және құлаған сәті делінген видеоны жариялаған. БАҚ мәліметінше, оқиға Домбаровский позициялық ауданында – Ясный әскери космодромы орналасқан аймақта тіркелген.

Құзырлы органдар әзірге ешқандай ресми түсініктеме берген жоқ.