Air Astana басшысы Питер Фостер ресми түрде қызметінен кетті

Бүгін, 1 сәуірден бастап Питер Фостер Air Astana тобының бас атқарушы директоры қызметін тоқтатты, деп хабарлайды Sadaq.kz.

Бұған дейін ұжымды басқарған Питер Фостер қызметінен кетіп, оның орнына жаңа бас атқарушы директор (CEO) тағайындалды. Бұл ауыс-түйіс туралы шешім өткен жылы қабылданғанымен, жаңа басшы 2026 жылдың 1 сәуірінен бастап өз міндетіне кірісті. Енді компанияның алдағы даму стратегиясы мен халықаралық нарықтағы позициясын нығайту жұмыстарын жаңа басшылық үйлестіретін болады.

Әуекомпанияның тізгінін Ибрахим Жанлыел қолға алды. Ол Air Astana құрылымында 14 жылдан астам уақыт бойы еңбек етіп, ұйымның стратегиялық шешімдерін қабылдауға тікелей қатысқан маман. 2017 жылдан бері қаржы директоры лауазымын атқарған ол компанияның ішкі және сыртқы экономикалық ахуалын жақсы білетін басқарушы ретінде танымал. Жаңа басшының келуімен компанияның операциялық тиімділігін арттыру мен тұрақты өсімді қамтамасыз етуге баса назар аударылмақ.

Соңғы жылдары Фостердің атына Қазақстан ішіндегі билет бағасының жоғары болуы мен рейстердің жиі кешігуіне байланысты жиі сын айтылды.