«Жақтағым келмейді»: Жансая Әбдімәлік Бибісара Асаубаеваға қатысты пікір білдірді

Қазақстандық шахматшы Жансая Әбдімәлік әлеуметтік желіде әріптесі Бибісара Асаубаеваға қатысты пікір білдірді, деп хабарлайды Sadaq.kz.

Спортшы Instagram парақшасындағы stories бөлімінде оқырмандарының сұрақтарына жауап берген. Солардың бірі Әбдімәліктен Бибісара Асаубаеваға қатысты көзқарасын сұрап, оны не үшін жиі сынға алатынын алға тартқан.

«Неге сіз Бибісараны сынайсыз? Ол турнирлерде жеңіске жетіп, еліміздің абыройын асырып жүр ғой», – деп жазған желі қолданушысы.

Бұған жауап ретінде Жансая Әбдімәлік танымал интернет-меммен бөлісіп, кейін жағдайға қатысты өз ұстанымын түсіндірді.

Шахматшының айтуынша, ол даудың мән-жайына терең үңіліп, қандай да бір тарапты қолдауды мақсат етпейді. Алайда көп жылдан бері шахматты дамыту ісімен айналысып келе жатқан маман ретінде оны басқа мәселе алаңдатады.

«Белгілі шахматшылардың айналасындағы кез келген қоғамдық дау-дамай бүкіл спорт түрінің беделіне әсер етеді. Шахматтан алыс адамдар біздің спортты жетістіктермен емес, жанжалдармен байланыстыра бастайды», – деді ол.

Сондай-ақ Әбдімәлік мұндай жағдайлар жас шахматшыларға кері әсер етуі мүмкін екенін атап өтті. Оның сөзінше, демеушілер мен серіктестер шахмат ортасын түрлі қақтығыстар арқылы қабылдап, саланы қолдаудан бас тартуы ықтимал.

«Қоғам алдында жүрген әр адам өз әрекеті мен сөзінің бүкіл шахмат қауымдастығының беделіне қалай әсер ететінін естен шығармауы керек», – деп түйіндеді шахматшы.