«Қыздығыңды аламын»: 11 жасынан тік ішегінен зорланған қыз әділдік сұрайды

Orda.kz бұған дейін 10 жылдан астам уақыт зорлық-зомбылыққа ұшырадым деп мәлімдеген Еркеназ Оразғалиева жайлы жазған болатын. Оның сөзінше  қорлық көрсеткен жиен ағасы тергеу бастала сала басқа жаққа көшіп кетіпті. Ал тергеу ісі тағы да жабылды.

Қорқыту мен зорлық жайлы

Еркеназ Оразғалиеваны кішкене кезінде анасы балалары жоқ туыстарына берген. Ата-әжесімен, асырап алған әке-шешесімен бірге тұрған Еркеназдың сөзінше туысқан ағасы 6 жасынан аймалап, порнографиялық бейнежазбалар көрсеткен. 11 жасынан бастап тік ішегінен зорлаған. Бұған дейін іс 2 рет жабылып, Аягөз аудандық полициясы істі қолға алған болатын. Осымен 3 рет жабылып отырған істе жәбірленуші болып отырған Еркеназ өзіне қорлық көрсеткен адамның жазаға тартылғанын қалайды.

«Ес білер шағымда, сол 6-7 жасымда жыныстық мүшесін көрсететін, ұстататын. Оның не екенін кішкене кезімде білмедім. Порнографиялық видеолар көрсететін. Бұл жағдай 11-12 жасыма дейін жалғасып келді. Бұны айтпа деп қорқытып, шымшып, ұрсып, қол көтеріп келді. Атамның 80 жас тойы болды. Бәріміз сол Ергебектердің үйінде жүрдік. Бәрі дайындалып жатты. Мен туысқан балалардың қасында жүрдім. Сонда үйге келіп ашуланып, мені итеріп, лақтырып... Ұзын өсіріе келе жатқан кекілім болатын, содан ұстап шкафқа лақтырып, одан көтеріп диванға лақтырып, содан жастықпен тұншықтырып, диванның үстінде қылқындырды. Сол 11-12 жасымда. Содан кекілімнен ұстап, жерге лақтырды да, 1-2 рет тепкілеп жіберді. Бар күшімен теппегенімен маған ауыр болатын. Ішім ауырғаннан мен түк сезбей бүктетіліп жатып қалдым. Ол шалбарымды шешті да, үстіме жатты. Дәл осы жерде тиісті ме, тиіспеді ме, ол жағын білмеймін. Содан той бәрі өтіп тынышталған соң, біз аулада туысқан бауырларыммен ойнап жүрдім. Біздің өзіміздің үлкен үйде ойнап жүрдік. Ергебек келіп үйге кіргізді. Ал үйдегілердің бәрі жаздық шай ішетін жерде отырған болатын. Мені үйге кіргізіп, шалбарымды шешіп, аузымды қолымен жауып, артқы жағымнан тиіскен. Онда қан болды ма, ол есімде жоқ. Бірақ ол нәрсенің маған қатты ауыр болғанын білемін. Сол дүниеден кейін мені арт жағымнан, тік ішегімнен зорлауды бастады. Қорқытуды бастады. Солай 16 жасыма дейін жалғаса берді», — деді Еркеназ Оразғалиева.

Ол зорлықтың үнемі қайталанып тұрғанын баяндады. Өзі кішкене кезінен қорқытып келген соң, әбден жүрексініп бұл оқиғаны айтуға батылы жетпегенін айтты.

«Кішкене кезімде тирдің мылтығымен атып, ұрып-тепкілеген кезі болды. Аяусыз қорқытатын. Өзенге апарып суға тұншықтырған кезі болды. Ай далаға апарып тиіскен кезі бар. Скакалкамен ұрған кезі бар. Әлемде неше қортытудың түрлері бар. Соның бәрімен қорқытып шыққан шығар. Кішкене кезімде соның бәрінен қорықтым», — деді Еркеназ Оразғалиева.

«Қыздығыңды аламын»

Ол бұл сұмдық 16 жасқа толғанға дейін болғанын баяндады. Тек 16 жасқа толып, ес біле бастағанда «қыздығыңды аламын», «тоқал етемін» деген сөздерден соң, шындықты айтқанын мәлімдеді.

«Көрші болғаннан кейін, бір ауылда тұрғаннан кейін ол маған жиі тиісетін. Аптасына бір-екі рет тиісіп отыратын. Біз үйде бесеу болып тұрдық. Өгей әке-шешем, атам мен әжем және мен. Бесеуімізді тұрғызып қойып «сиюге сұранатындай халге жеткіземін» деп қорқытатын», — деді Еркеназ.

Оның сөзінше, 9-сыныптан кейін де Жұмаханов Ергебек есімді туысқан ағасы тік ішегінен зорлық көрсетуді жалғастыра берген.

«2020-2021 оқу жылында дәл мен қалаға оқуға 9 сыныптан кейін ол Курчатов қаласына ауысты. Мен апайымның үйінде тұрдым. Ол болса қаладан сенбі-жексенбі күндері келіп тұрды. Сол кезде үйде ешкім жоқ кезде мені тік ішегімнен зорлап, тиісіп жүретін. Сол кезден бастап «мен сені тоқал қылып аламын», «қыздығыңды аламын» деп бастады. Түннің бір уағында сыртқа шығарып алып, машинасына отырғызып әңгіме айтатын. Оның зорлағанын білді ме, ол жағын білмеймін. Бірақ сол үйдегі апайым оның мені шығарып әңгіме айтып жүргенін көріп-біліп жүрді. Бірақ тіс жарып ештеңе айтпады. Қазір мен қалаға оқуға келгеннен бастап ол Курчатов қаласына ауысты ғой. Сол жақта әлі жүр деп естідім. Оның не үшін көшкенін айтсам, тергеу ісі бастала сала олар көшіп кетті. Мен тұрған үйді сатып, өздерінің үйін жай құлыптады да көшіп кетті. Семей қаласына, мен бірге тұрған атам мен әжемді алып көшіп кетті», — деді Еркеназ.

«Тергеу ісін маған қарсы жинаған»

Ол тергеу ісіне жабылғанына қатты наразы болып, тергеу ісіне мүлде көңілі толмайтынын айтты. Айтуынша тергеу ісі өзіне қатысты көшірілген сөздерге толы.

«Тергеу ісіне мүлде көңілім толмайды. Семейде бала дәрігерлеріне қаратты. «Эспертиза дайын. Өту керек» деп айтты хабарласқан еді. Мамам бар бала-шағаны тастап мені ертіп апарды. Барсақ не қаралатын дәрігер дайын емес. Қайдағы бір бала дәрігеріне қаратты. Ол болса «сенде ішкі жақта геморрой бар» деді. Солай мені қарайтын үлкендердің проктолыгы жоқ болған соң, сол дәрігерге қаралдым. «Біз тым болмаса өз ақшамызға түсейікші» десек, «онда сіздер сатып алған боласыздар» деп айтты менің ісімді тергеген тергеуші Лаура деген кісі. Ал «Астарлы ақиқаттың» адвокаттарына сөйлессек, негізі болады екен. Сол тергеуші жанымызда жүреді, ал біз тексеріле береміз. Ал ол бізде сол моментте заңсыз деген болатын», —деді Еркеназ.

Сонымен қатар сараптама үшін нархозбен жатқызғанда сандырақтап, Ергебектің атын айтып, қорғау сұрағанын айтты. Оның айтуынша, осылай үлкендер қарайтын проктологқа қаратудың орнына балалар дәрігері қараған. Жалпы эспертизаға оның көңілі толмайтынын айтты. Оның айтуынша, эспертиза «ішкі геморрой», «артқы тік ішектен жыныстық қатынасқа түскеннен» т.б. болуы мүмкін себептер жазып берсе, басқа проктолог «жарылулар және басқа адамдарға қарағанда тіндердің жыртылуы көп» деген.

«Іс жабылғаннан кейін бізге бүкіл том-том ісімізді береді ғой. Сонда бәрін оқып шықсақ, бәрін мен жайлы, маған қарсы жинаған. Бүкіл елдің айтқан сөздері бір-бірінен көшіріп қойылған. Мен туралы сұраған сөздер үтір-нүктесіне дейін көшіріліп қойылған. Менің группаластарымнан, сыныптас қыздарымнан сұрастырыпты. Олар маған хабарласты «Еркеназ, сенің тергеушің қуа ма? Сені кішкене кезіңде қандай киім киіп еді? Қандай тамақ жеді? деп сұрақ қойып тұр. Сені Ергебек зорлады ма? Әлде Ергебек сені зорлады ма?» деп қыздар күліп хабарласты. Жалпы тергеушілер дұрыс тергемей жатыр деп үндеу жасағанмын. Тергеу ісім осымен 3-рет жабылып қалды», — деді Еркеназ.

«Халықты жылатқан тергеушілердің орнын басқым келеді»

Ол болашақта психолог мамандығына түсіп, зорлық көргендерге көмектескісі келетінін, болмаса тергеуші болып әділдіктің жағында болғысы келетінін айтты.

«Қазір мен бастауыш сыныптың мұғалімі мамандығында оқып жатырмын. 4-курс. 9 сыныптан соң келгенмін. Менің мақсатым мұғалім болу емес, сол дипломмен университетке психолог мамандығынп түскім келеді. Бәрін жетік біліп, оқып, жоғарғысын оқып, өзім сияқты зорлық көрген бойжеткендерге, балаларға көмектесіп, жан-жарасын емдегім келеді. Екінші мақсатым — тергеуші болғым келеді. Екі мақсатымның бірін болмаса бірін алып шығамын. Қазақтың қаракөз қыздарын жылатып, тек қана қыздарын емес бүкіл халықты жылатып отырған әділетсіз тергеушілердің орнын басып, әділдік алып келгім келеді. Менің мақсатым осы», — деді Еркеназ Оразғалиева.

«One stope service - Бір қадам» ұйымының басшысы, адвокат Айман Омарова істі қолға алып отыр. Еркеназ Оразғалиеваның құқық қорғаушыларының бірі Ләззат Рақышева көп істерде тергеушілердің көз жұматыны жайлы айтты.

«Біздің орталықтың әр өңірде адвокаттары бар. Абай облысындағы адвокатымыз осы істі қолға алды. Сарапшының нақты эспертизасында дәлелденді. Арт жағында кәдімгі тесік, шұңқыр сияқты бар. «Зорлық зомбылықсыз 16 күн» атты акция болғанда біз Астанаға бардық. «One stope service - Бір қадамның» осындай қысқартылған істері жайлы айттық. Бала омбудсмені Динара Зәкиева да хабарласып, психолог берді. Психологиялық көмек көрсетіліп жатыр. Біз тоқтамаймыз. Бұлар істі қысқартып тастағанымен бас прокуратураға барамыз. Қызымыз әділдікке жетуі үшін үлесімізді қосамыз. Біздің психолог та, адвокаттарымыз да көмек қолын созып жатыр. Осындай әділетсіздікті көп көрдік. Бұған дейін де қысқарған істеріміз болды. Жемқорлықтан ба, білімсіздіктен бе, кейбін тергеушілер осындай істерде көз жұмып жатады», — деді Ләззат Рақышева. 

Оның айтуынша әділдікке жету үшін міндетті түрде резонанс болуы керек. Онсыз әділдікке жету қиын. 

Еркеназдың анасы өздеріне іс тоқтағаны жайлы хат келгенін айтты. Істі қайта қозғаса, тергеушіні ауыстырғылары келетінін жеткізді.

«Тергеу тоқтады деп ешкім қоңырау шалмады. 11 желтоқсан іс тоқтағаны жайлы хат келді. Біздің тергеуші Лаура Төлепбергеноваға көңіліміз толмайды. Әу баста істі қолға алғаннан бастап дұрыс тергемеді. Бізді Семейге бүкіл экспертиза дайын тұр деп бір-ақ күнде апарды да, бір апта тентіретіп жүргізіп қойды. Біресе анда барады, біресе мында барады. Ешқандай больница бізді қабылдаған жоқ. Одан кейін бізді қарағандардың бәрі бала дәрігері болып шықты. Кәдімгі маман емес, бала дәрігерлері. Олар болса геморрой деп жазып берген. Ал шын мәнінде Алматыдағы маманға қаратқанда балада мүлде геморрой жоқ екенін білдік. Одан кейін бұл тергеуші қыз мен далаға шығып кеткен кездері «сен өтірік айтып тұрған шығарсың», «өтірік айтсаң, айта сал, мен саған көмектесемін» деп айтқан екен. Олар керісінше бізді зерттеп, біз туралы ақпаратты көп жинады. Бүкіл тергеу алғанда бізді видеомен алады да, ал ана жақты тергегенде мүлде видео ештеңені қоспайды. Мені де, жолдасымды да, үлкен қызымды да видеомен алды. Егер іс қайта қозғалып, қайта жүрсе біз осы тергеушіні ауыстырғымыз келеді. Бізді астанаға да алып барды. Екі дәрігерге. Олар баланы қараған жоқ. Сонымен қоймай балада ондай ештеңе жоқ деп қорытынды жазып берді», — деді анасы.

Анасы қыздарын кішкене кезінде бергендеріне өкінетіндерін айтты.

«Біз баламызды бергенімізге өкінеміз. Мұндай жағдай болады деп ойлаған жоқпыз. Тек кинодан ғана көретін жағдайымыз еді. Мұндай ауылды жерде біздің басымызда болады деп ойламадық. Асырап алған қайын ағам мен абысыным өте жақсы адамдар. Оларға ешқандай өкпем жоқ. Еркеназға туған әке-шешесіндей қарады. Мұндай жағдай болады деп ойлаған жоқпыз», — деді анасы.