Блогер Әділетхан Молдахан 2,5 жылға бас бостандығынан айырылды
Алматыда Әл-Фараби даңғылындағы жантүршігерлік жол апатына қатысты видео жариялаған заңгер-блогер Әділетхан Молдаханға қатысты сот үкімі шықты, деп хабарлайды Sadaq.kz.
Ол Қылмыстық кодекстің 274-бабының 3-бөлігі ("Көрінеу жалған ақпарат тарату") бойынша 2 жыл 6 айға бас бостандығынан айырылды. Сонымен қатар 5 жыл бойы блогерлік қызметпен айналысуына тыйым салынды.
Бұл туралы журналист Руслан Өтепбай мәлімдеді.
"Ағайын, өкінішке қарай, сот Әділетхан Молдаханды 2 жыл 6 айға бас бостандығынан айыру туралы үкім шығарды. Сонымен қатар, сот үкіміне сәйкес, ол 5 жыл бойы блогерлік қызметпен айналыса алмайды. Алайда Әділетханның қорғаушылары бұл үкіммен келіспейтіндерін айтып, жақын күндері Алматы қалалық сотына апелляциялық шағым түсіретіндерін мәлімдеді", – деді журналист.
Айта кетейік, Әділетхан Молдаханға Әл-Фараби даңғылындағы жол апатына қатысты жариялаған видеосынан кейін жалған ақпарат таратты деген айып тағылған болатын.
