Қорғанысы мықты елді жау алмайды

Қазақстан Республикасы тәуелсіздік алғаннан бері халықаралық аренада белсенді әрі теңгерімді сыртқы саясат жүргізіп келеді. Бұл саясаттың маңызды бөлігі – өзге елдермен және халықаралық ұйымдармен әскери ынтымақтастықты дамыту. Қазақстанның әскери ынтымақтастығы ұлттық қауіпсіздікті қамтамасыз етуге, аймақтық тұрақтылықты нығайтуға және халықаралық міндеттемелерді орындауға бағытталған, деп хабарлады sadaq.kz.

Қазақстанның әскери ынтымақтастығы бірнеше негізгі мақсатқа бағытталған:

Ұлттық қауіпсіздікті қамтамасыз ету: Елдің егемендігі мен аумақтық тұтастығын қорғау.
Аймақтық және жаһандық тұрақтылықты нығайту: Соғыстар мен қарулы қақтығыстардың алдын алу.
Халықаралық міндеттемелерді орындау: Бітімгершілік миссияларына қатысу және халықаралық құқық нормаларын сақтау.
Әскери әлеуетті дамыту: Қарулы Күштердің технологиялық және кәсіби деңгейін арттыру.

Сонымен қатар Қазақстанның әскери ынтымақтастықты жүзеге асыру барысында мынадай принциптерді негіз етіп ұстанады:
Басқа мемлекеттердің егемендігін және аумақтық тұтастығын құрметтеу.
Халықаралық дау-дамайларды бейбіт жолмен шешу.
Өзара тиімді ынтымақтастық пен сенім шараларын нығайту.
Халықаралық құқық нормаларына сәйкес әрекет ету.

Еліміз бүгінде бірнеше халықаралық және аймақтық ұйымдармен әскери ынтымақтастық жасап келеді. 

Солардың бірі  - Ұжымдық қауіпсіздік туралы шарт ұйымы (ҰҚШҰ)

Қазақстан ҰҚШҰ-ның құрылтайшы мемлекеттерінің бірі болып табылады. Бұл ұйым аясында Ресей, Беларусь, Армения, Қырғызстан және Тәжікстанмен бірлескен әскери жаттығулар, қауіпсіздікті қамтамасыз ету шаралары және ақпарат алмасу жүзеге асырылады. ҰҚШҰ-ның Жедел әрекет ету ұжымдық күштері (ЖӘҰК) құрамында қазақстандық әскери контингенттер аймақтық қауіптерге қарсы дайындықтан өтеді.

Шанхай ынтымақтастық ұйымы (ШЫҰ)

ШЫҰ аясында Қазақстан Қытай, Ресей және Орталық Азия елдерімен терроризмге, экстремизмге және сепаратизмге қарсы күресте ынтымақтасады. “Бейбіт миссия” атты бірлескен әскери жаттығулар ШЫҰ-ға мүше елдердің әскери әлеуетін нығайтуға және өзара сенімді арттыруға бағытталған.

Біріккен Ұлттар Ұйымы (БҰҰ)

Қазақстан БҰҰ-ның бітімгершілік миссияларына белсенді қатысады. Мысалы, қазақстандық әскери қызметшілер Ливандағы және басқа да аймақтардағы БҰҰ миссияларына қатысып, халықаралық қауіпсіздікті қамтамасыз етуге үлес қосады. Сонымен қатар, Қазақстан ядролық қаруды таратпау және жаппай қырып-жою қаруына қарсы күрес саласындағы БҰҰ бастамаларын қолдайды.

Қазақ елі осындай халықаралық бітімгершілік миссияларына қатысу арқылы жаһандық қауіпсіздікке үлес қосып отыр. БҰҰ аясындағы миссиялардан бөлек, Қазақстан гуманитарлық көмек көрсету және дағдарыс аймақтарында тұрақтылықты қамтамасыз ету бойынша бірқатар жобаға бастамашы болғаны белгілі. Мәселен қазақстандық әскери дәрігерлер мен инженерлер бірқатар халықаралық миссияларда маңызды рөл атқарды. Бұл өз кезегінде еліміздің сыртқы саясаты мен имиджіне де оң әсер етті.

НАТО және Қазақстан

Қазақстан Солтүстік Атлантикалық Альянспен (НАТО) “Бейбітшілік үшін серіктестік” бағдарламасы аясында ынтымақтасады. Бұл бағдарлама қазақстандық әскери қызметшілердің кәсіби дайындығын арттыруға, халықаралық стандарттарға сәйкес әскери реформалар жүргізуге және бірлескен жаттығуларға қатысуға мүмкіндік береді. Мысалы, “Дала қыраны” (Steppe Eagle) халықаралық жаттығуы Қазақстанда тұрақты түрде өткізіліп, НАТО және серіктес елдердің әскери күштерімен өзара әрекеттестікті нығайтады.