Ресей жапон журналисін тыңшылық жасады деген күдікпен қамауға алды

14 қазанда Ресей қауіпсіздік қызметі (ФСБ) Жапонияның Хоккайдо Симбун газетінің тілшісі Юки Имаиды Сахалин аралында тыңшылық жасады деген күдікпен қамауға алды. BBC, The Guardian және Sky News хабарлауынша, журналист Ресейдің қорғаныс қабілеті туралы ақпарат жинап, оны Токиоға бермек болған.

ФСБ мәліметінше, Имаи Жапонияның ұлттық барлау қызметінің тапсырмасымен әрекет еткен. Ол Сахалиннен Жапонияға қайтуға дайындалып жатқан кезде ұсталған. Қауіпсіздік қызметі таратқан видеода бетперде киген офицерлер қонақүй бөлмесіне басып кіріп, ер адамды еденге жатқызып, қолына кісен салғаны көрсетілген.

Журналист Мәскеуге жеткізіліп, сот оны 12 желтоқсанға дейін қамауда ұстау туралы шешім шығарған. Тыңшылық айыбы бойынша 20 жылға дейін бас бостандығынан айыру жазасы қарастырылған.

Жапонияның реакциясы

Жапония премьер-министрі Санаэ Такаичи үкіметтің «фактілерді тексеріп жатқанын» және «тиісті шара қолданатынын» айтты. Жапония Сыртқы істер министрлігі Ресейден журналистке «әділ және бейтарап қарауды» талап етті.

Ресей Сыртқы істер министрлігінің ресми өкілі Мария Захарова Токионың Ресейдегі тілшілерін ел қауіпсіздігіне нұқсан келтіретін ақпарат жинау үшін пайдалану әрекетін «өкінішті» деп атады және бұл «оқшауланған жағдай емес» екенін айтты.

Имаидың ұсталуы Мәскеу мен Токио арасындағы қарым-қатынас нашарлаған кезеңге тұспа-тұс келді. Тамызда Ресей президенті Владимир Путин даулы Курил аралдарына барған еді, бұл Жапонияның наразылығын тудырған. Жапония Курил тізбегінің оңтүстігіндегі төрт аралды өзінің «Солтүстік территориялары» деп санайды.

Бұған дейін 2023 жылы Ресейде американдық The Wall Street Journal журналисі Эван Гершкович тыңшылық айыбымен ұсталып, кейін 16 жылға сотталған, 2024 жылы тұтқын алмасу кезінде босатылған еді.

Хоккайдо Симбун басылымы журналистің ұсталғанын растап, «Журналистің қауіпсіздігі – біздің басты басымдығымыз» деп мәлімдеді.