«15 жыл бойы 30-ға жуық мәйітті жасырын сақтаған» - Жерлеу бюросының сұмдығы ашылды

АҚШ-тың Колорадо штатындағы Пуэбло қаласында қоғамды дүр сілкіндірген оқиға орын алды. Құзырлы органдар Davis Mortuary жерлеу бюросынан ұзақ жылдар бойы сақталып келген 30-ға жуық мәйітті анықтады, деп жазады Alash.kz.

Бұл мекеме аудандық коронер Брайан Коттердің меншігі екені белгілі болды. Тексеру барысында мәйіттердің жасырын бөлмеде, картоннан жасалған сөреге ұқсас есіктің ар жағында сақталғаны белгілі болды. Кейбір денелер кремацияны 15 жылға дейін күткен. Ал марқұмдардың жақындарына бюро иесі қолдан жасалған, жалған күл салынған урналарды тапсырған.

Оқиғадан кейін жерлеу үйінің лицензиясының күші жойылды. Жергілікті билік бұл жағдайды “заңның өрескел бұзылуы” әрі “отбасылар сенімін аяқ асты ету” деп бағалады. Дегенмен Брайан Коттер әлі қамауға алынған жоқ, тергеу жалғасуда.

Davis Mortuary ресми сайтында мекеменің 1989 жылдан бері жұмыс істейтіні, ал оның басшылары өзін “жерлеу ісіндегі дәстүрлі мектеп өкілдері” ретінде таныстырғаны жазылған.

Associated Press мәліметінше, жақын уақытқа дейін Колорадо штатында жерлеу саласы ең аз қадағаланатын салалардың бірі болып келген. Тексерулер шағым түскен жағдайда ғана жүргізіліп, қызметкерлердің арнайы білімі мен лицензиясы талап етілмеген.

Тек 2023 жылы өзге бір жерлеу бюросынан 200-ге жуық мәйіт табылғаннан кейін заң қатайтылды. Сол мекеме иесі мәйіт бөліктерін сатқаны және қолдан жасалған урналарды тапсырғаны үшін сотталған. Қазір жаңа талаптарға сәйкес, жерлеу үйлерінің директорлары мен қызметкерлері арнайы оқу бағдарламасынан өтіп, лицензия алып, жеке деректері бойынша тексеруден өтуге міндетті