Бесағашта тағы да көшкін жүрді: Тұрғындарды эвакуациялауға тура келді

Алматы облысының Бесағаш ауылында тұрғын үйлердің үстіне тағы да топырақ көшкіні құлады. Шамамен 150 текше метр грунт Баянауыл көшесіндегі үйлердің ауласын басып қалған. Бұл туралы Sadaq.kz порталы Tengrinews.kz-ке сілтеме жасап хабарлайды.

Төтенше жағдайлар департаментінің мәліметінше, 2 наурыз күні сағат 20:59-да Баянауыл көшесінде топырақтың ылғалдануына байланысты шамамен 150 текше метр грунт опырылып түскен. Оқиға салдарынан аула құрылыстары мен аумақты абаттандыру элементтері зақымдалды. Қаза болғандар мен зардап шеккендер жоқ, алайда 17 адам шұғыл түрде эвакуацияланды.

Бұл аталған ауылдағы соңғы бір ай ішіндегі алғашқы оқиға емес. Осыған дейін, 7-8 ақпанда дәл осы коттедж қалашығында топырақ сырғып, автокөлік пен бастырманы басып қалған болатын. Тұрғындар өз баспаналарының апатты жағдайда екенін айтып, биліктен көшіруді бірнеше рет сұраған.

Тұрғындардың сөзінше, қауіпті аймақтағы 11 үйдің тек 8-іне ғана қорғаныс қабырғасы салынған, ал қалған 3 үй ешқандай қорғаныссыз қалған.

«Бізге уақытша тұруға 5 пәтер беріледі деп уәде бергенімен, эвакуацияланғандардың басым бөлігі қазір туыстарын паналап жүр. Тұрғын үйлерді апатты деп тану мәселесі әлі шешімін тапқан жоқ», — дейді ашынған тұрғындар.