Сүйегі бірнеше күннен кейін табылды: Лос-Анджелестегі алапат өрттен Голливудтың атақты актрисасы тірідей жанып кетті

АҚШ-тың Лос-Анджелес қаласында орын алған өрт салдарынан Голливудтың танымал актрисасы Делис Карри қаза тапты. Бұл туралы sadaq.kz сайты Forbes басылымына сілтеме жасап хабарлады.

95 жастағы актриса Лос-Анджелестегі өз үйінде өртке оранып, тірідей жанып кеткен. Оның сүйегі өрттен бірнеше күн өткен соң ғана табылған.

Делис Карри «Он өсиет», «Ағайынды блюз», «Леди блюз әнін айтады» және басқа да фильмдердегі рөлдерімен танымал болған.

Айта кетсек, 7 қаңтарда Лос-Анджелес аймағында басталған орман өрттері штат тарихындағы ең ірі өрттердің бірі ретінде тіркелді. Жергілікті биліктің мәліметінше, өрт жалпы 16 мың гектар аумақты шарпыған. Оқиға салдарынан кемінде 24 адам қайтыс болып, 12 300-ден астам ғимарат, соның ішінде атақты адамдардың үйлері қираған. Метеорологтар өрттің тез таралуына құрғақ әрі желді ауа райы себеп болғанын мәлімдеді.