Жалған науқастар мен өлі жандарға қызмет: Бектенов ФСМС-ті Минфинге беруді тапсырды

Премьер-министр Олжас Бектенов Мемлекеттік әлеуметтік медициналық сақтандыру қорын (ФСМС) Қаржы министрлігінің қарамағына беру мәселесін пысықтауды тапсырды. Мұндай шешім Қаржы министрлігі жүргізген тексеріс нәтижелерінен кейін қабылданған және талдау премьер-министрдің тікелей тапсырмасымен жүзеге асырылған, деп хабарлайды Sadaq.kz.

Қазақстандағы медициналық сақтандыру жүйесіне бөлінетін қаржы көлемі соңғы жылдары рекордтық деңгейге жетті. Егер 2020 жылы салаға 1,4 трлн теңге бағытталса, 2026 жылы бұл көрсеткіш 2,4 трлн теңгеге дейін өседі деп жоспарланған. Яғни, бес жыл ішінде бюджет 1 трлн теңгеге немесе 70%-ға ұлғайды. Алайда, Үкімет басшысы Олжас Бектенов бұл қаржының тиімділігін қатаң сынға алып, бюджеттің өсуі көрсетілетін қызмет сапасына әсер етпегенін мәлімдеді.

Бектеновтің наразылығына медициналық мекемелердегі «көзбояушылық» пен жалған есептер себеп болған. Тексерістер нәтижесінде логикаға сыймайтын деректер ашылды: есеп бойынша 768 мыңнан астам ер адам жатыр мойны обырына скрининг өткен, ал тағы 600 ер адамға маммография жасалған. Сонымен қатар, Астанадағы клиникалардың бірінде бір дәрігердің бір күнде 1 442 пациентті қабылдағаны тіркелген. Мұндай «өлі жандарды» жазып қою арқылы мемлекет қаржысын негізсіз иемдену жүйелі сипат алып отыр.

Қаржылық ашықтық мәселесі де өткір тұр. 2020 жылдан бері МӘМС активтерін инвестициялау арқылы түскен табыс 588 млрд теңгеден асты, оның 196 млрд теңгесі тек 2025 жылдың үлесінде. Бірақ бұл қаражаттың басым бөлігі пациенттердің нақты еміне емес, қордың жинағы ретінде қалып отыр. Бектенов бұл соманың «өлі капитал» болып тұрмай, нақты медициналық қызметтерге, дәрі-дәрмекпен қамтамасыз етуге жұмсалуын талап етті.

Ендігі кезекте Үкімет қордың жұмыс істеу моделін өзгертіп, қаржылық бақылауды цифрландыру арқылы күшейтеді. Бектеновтің тапсырмасы бойынша, әрбір теңгеге ревизия жасалып, жалған есеп беруші мекемелер жауапкершілікке тартылады.

Егер жүйедегі «виртуалды» қызметтер мен негізсіз шығындар толық жойылса, бюджеттен бөлінген триллиондар әрбір қазақстандықтың сапалы әрі қолжетімді медициналық көмек алуына мүмкіндік береді, деп мәлімдейді Sadaq.kz ақпараттық порталы.