Қаңтар қасіреті әлем сахнасында: ЖИ көмегімен жасалған анимация Берлинде көрсетілмек
2022 жылғы қасіретті Қаңтар оқиғасы әлемдік кино өнерінің төрінде талқыланбақ. Халықаралық деңгейдегі танымал пәнаралық суретші және бейне-арт шебері Алмагүл Меңлібаеваның жасанды интеллект (AI) технологиясымен жасаған «AI Realism – Qantar 2022» атты қысқаметражды туындысы 76-шы Берлин халықаралық кинофестивалінің (Berlinale) ресми бағдарламасына енді, деп хабарлайды Sadaq.kz.
Автордың айтуынша, жобаның негізгі мақсаты — үзінділер арқылы «контр-естелік» қалыптастырып, ЖИ-дің ақпараттық соғыстағы күші мен дәрменсіздігін паш ету. Бұл — қазақ өнеріндегі заманауи технологияны саяси-әлеуметтік тақырыпта қолданған алғашқы ауқымды эксперименттердің бірі.
Айта кетейік, Берлинале — Канн және Венеция байқауларымен қатар тұратын әлемдегі ең беделді кинофорум. Онда туындысы таныстырылатын Меңлібаеваның жұмыстары бұған дейін Венеция биенналесі мен Нью-Йорктің ірі галереяларында жоғары бағаланған.
Аталған халықаралық шара 2026 жылдың 12–22 ақпан аралығында Германия астанасында өтеді.
